Kryeministri, Edi Rama, duket se është shqetësuar nga përplasjet brenda PS gjatë mbledhjes së fundit të grupit të zgjeruar parlamentar.
Në takimin që zhvilloi me asamblenë socialiste të Njësisë 7 në kryeqytet, Rama u ndal pikërisht tek këto përplasje, të cilat nuk i mohoi. Ndërsa i la mediat jashtë takimit që e zhvilloi me dyer të mbyllura dhe me terr të plotë informativ, ai akuzoi mediat që i cilësoi “kanale, portale dhe tenxhere”, që në vend që “të raportojnë hallet e shqiptarëve dhe problemet në vend, informojnë se çfarë i thashë unë njërës apo tjetrit’.
“Kanalet dhe portalet merren shumë pak me problemet reale dhe hallet e Shqipërisë, merren me thashetheme, me llafe, gjysmë të vërteta, akuza dhe kundërakuza, duke e kthyer hapësirën e komunikimit publik në një Pazar të madh ku ziejnë të gjitha tenxheret. Ishte spektakolare, e pabesueshme edhe për mua që, besoj që nuk ka më çfarë më surprizon, që ne mblidhemi në një mbledhje të zgjeruar të grupit parlamentar me qeverinë, që e bëjmë çdo fund muaji, për të diskutuar tema specifike, për të dëgjuar qeveria deputetët dhe anasjelltas”, u shpreh ai.
Kryeministri vijoi më tej duke treguar se çfarë, sipas tij, duhet të raportojë media, duke nënvizuar se më e rëndësishme për publikun është rritja e çmimit të naftës sesa përplasjet në PS.
“Raportojnë për publikun çfarë i tha Edi Rama njërës e çfarë i tha tjetrit. Natyrisht që shqetësimi nuk është ky. Njerëzit kanë votuar dhe duan të dinë gjëra të tjera. Janë të shqetësuar për çmimin e naftës, kjo është jeta reale. Çmimi që rritet si rezultat i një lufte”, u shpreh ai.
Megjithatë, kryeministri duhet të dijë se risia e ngjarjeve përbën lajm kryesor. Në këtë kuptim, nuk përbën më lajm fakti që masat e vakëta të qeverisë nuk arrijnë të ulin çmimin e naftës në Shqipëri. Ndërsa e kundërta ndodh kur, pas kaq shumë vitesh, nisin përplasjet brenda një partie që ka funksionuar si një strukturë e drejtuar nga urdhrat e një shefi dhe vartësit e tij të bindur. Sidomos kur kjo përplasje ndodh mes “Skënderbeut” dhe “Mamicës”.
