Kryeministri Rama, në podcastin e tij “Flasim”, foli për garën e ardhshme për kryebashkiakun e Tiranës, pas shkarkimit të Erion Veliajt.
“Kushdo që voton mua dhe Partinë Socialiste, do të votojë Ogertën, që t’i japë Tiranës drejtuesen e duhur dhe qeverisë partneren e duhur në krye të bashkisë, për të vazhduar punën transformuese për kryeqytetin e Shqipërisë 2030,” deklaroi Rama.
Duke iu referuar garës në rang vendi, kreu i qeverisë theksoi se këto zgjedhje sjellin një risi absolute, pasi në dy qytete të mëdha, Tiranë dhe Vlorë, kandidatet e mazhorancës janë gra me karrierë të spikatur në fushën e shëndetësisë: “Dy gra që kanë drejtuar me sukses Qendrën Spitalore Universitare dhe Spitalin Rajonal të Vlorës, duke i transformuar ato përmes kapacitetit të tyre menaxherial dhe vullnetit të hekurt.”
Rama nuk kurseu ironitë ndaj kandidatit të opozitës për Tiranën, aktorit Florian Binaj, duke e quajtur “një aktor humori në rolin e një kandidati gjoja të pavarur”.
“Këneta është kaq e dëshpëruar, sa për Tiranën ka nxjerrë një aktor humori në rolin e një kandidati gjoja të pavarur, që për vite të tëra i ka bërë për të qeshur të gjithë, madje edhe vetë Kongresin e Partisë Socialiste,” u shpreh Rama.
Ai shtoi se “aktorët me role jetojnë” dhe se nuk e gjykon Binajn për vendimin e tij, por theksoi se “kundërshtarët përfaqësojnë shembëlltyrën më kuptimplote të humbjes së radhës”.
