Në një intervistë të gjatë për revistën prestigjioze gjermane ZEITmagazin, kryeministri Edi Rama është pyetur drejtpërdrejt për arrestimin e ish-kryetarit të Bashkisë së Tiranës, Erion Veliaj, dhe për ndikimin e korrupsionit në qeverinë e tij.
Duke iu përgjigjur gazetarit gjerman që e pyeti nëse korrupsioni ka prekur qeverinë shqiptare, Rama pranoi se “njerëzit në nivele të ndryshme të qeverisjes preken nga korrupsioni”, por theksoi se pyetja më e rëndësishme është si reagon shteti ndaj këtyre rasteve.
“Jam krenar që kemi bërë diçka të madhe – radikale: një reformë gjyqësore që, për herë të parë në historinë tonë që nga pavarësia në vitin 1912, i solli zyrtarët e lartë para një gjyqësori të pavarur dhe çoi në akuza ose dënime”, deklaroi Rama.
Ai mohoi që Partia Socialiste të jetë kthyer në një mburojë për personat e përfshirë në afera korruptive, duke thënë: “Për dekada, përgjigjja ka qenë të formohej një mburojë mbrojtëse. Ne i kemi dhënë fund kësaj. Partia jonë nuk është një mburojë mbrojtëse për askënd; shumica jonë në Parlament është vetëm mburoja e gjyqësorit të pavarur.”
Për kritikat e vazhdueshme ndaj qeverisë, Rama u shpreh se ato janë pjesë e “çmimit të pushtetit”.
