Kryeministri Edi Rama ka reaguar ashpër në rrjetet sociale pas një tjetër vendimi të marrë nga sistemi i drejtësisë, të cilin ai e konsideron si një goditje kundër interesit publik dhe ligjshmërisë. Pas kritikave të forta ndaj prokurores Elsa Gjeli, e cila sipas tij nuk ndërmori hetime për një kompleks turistik të ndërtuar pa leje në Theth, Rama ka akuzuar edhe gjyqtarin Hazbi Balliu për një vendim që favorizon ndërtuesit informalë.
Në një postim në Facebook, kreu i qeverisë shprehet se gjyqtari Balliu vendosi një masë sigurie që i rikthen ndërtuesve një pallat të konfiskuar nga shteti, pavarësisht shkeljeve të rënda ligjore. “Pas prokurores Gjeli, e cila nuk hapi hetime për një fshat turistik të ndërtuar pa leje në zemër të Thethit, dje u shfaq gjyqtari Balliu, i cili i ktheu një pallat të konfiskuar ndërtuesve të paligjshëm, duke vendosur masë sigurie në favor të tyre”, shkruan Rama.
Ai e cilëson këtë veprim si pjesë të asaj që e quan “llogorja e Antishtetit dhe Antiligjit”, duke akuzuar segmente të drejtësisë për bashkëpunim të hapur me shkelësit e ligjit dhe për sabotim të reformës në drejtësi. “Janë thika pas shpine jo ndaj qeverisë, por ndaj shtetit dhe qytetarëve të ndershëm”, shkruan Rama, duke kërkuar reagim të menjëhershëm nga institucionet e pavarura të qeverisjes së drejtësisë.
Kryeministri nuk kurseu ironinë dhe kritikat edhe ndaj organeve të reja të drejtësisë, që sipas tij kanë zgjedhur të heshtin përballë këtyre rasteve skandaloze. “Ku janë institucionet e pavarura të qeverisjes së gjyqësorit? Ku ta kërkojmë ne llogarinë për thikat që Republika merr nga Gjelat e Ballinjtë brenda sistemit të drejtësisë?”, shkruan ai.
Në fund të reagimit, Rama thekson se qytetarët i kanë dhënë qeverisë së tij një mandat të qartë për ta çuar vendin drejt anëtarësimit në Bashkimin Europian dhe ndërtimit të një shteti të së drejtës deri në vitin 2030. “Drejtësia vonon, por nuk harron”, përfundon ai, duke lënë të kuptohet se përplasjet me segmente të drejtësisë do të vijojnë edhe më tej
