Tallja që bëri me Aliyev dhe Macron mbi gafën e presidentit të SHBA, Donald Trump, duket se i ka krijuar një siklet kryeministrit Edi Rama, i cili tani shfrytëzon çdo dalje publike gjatë takimeve në BE për ta justifikuar si një shaka momenti.
Gjatë një dialogu në Berlin me moderatorin Ali Asllan, Rama u shpreh se mënyra si u komentua në BE është argëtuese, ndërsa në SHBA sulmoi kundërshtarët e Trump duke thënë se përdorimi që i bënë shakasë tregon se e kanë humbur realitetin.
“Kjo është një shembull tjetër sesa keq janë demokratët në SHBA sepse kjo ka qenë një shaka miqësore me Ilham Aliyev, sepse jemi miq të ngushtë. Ishte vërtet shumë mirë që shiheshim pas kaq përpjekjesh për të vrarë njëri-tjetrin. Fakti që kjo shaka miqësore u bë virale në Evropë është argëtuese, por fakti që në SHBA u përdor për të sulmuar presidentin ishte diçka që më mërziti shumë në thelb për demokratët, sepse e kanë humbur realitetin dhe vazhdojnë të besojnë se epërsia morale mjafton për ta pretenduar që Presidenti Trump është aty ku është”, tha Rama.
Dukshëm duket se kryeministri i ka rënë pishmanit për shakanë e tepruar, sidomos me një gafë që ka të bëjë me Donald Trump, një president atipik që nuk harron asnjë fjalë e thënë në dëm të tij. Këtë e ka treguar edhe në takime të tjera, më e fundit me ambasadorin australian, i cili e kishte kritikuar Trump-in gjatë mandatit të parë. Por presidenti amerikan nuk harroi të ia kthente ish-kryeministrit austrialian, duke i thënë se nuk i pëlqente si person dhe as nuk do t’i pëlqente asnjëherë.
Ndoshta edhe Rama, përmes batutave të tij bajate, i druhet ndonjë tërheqje vëmendjeje nga Trump. Prandaj, ai jo vetëm reagon për mediat ndërkombëtare për ta sqaruar, por nuk harron as ta lavdërojë rikthimin e tij si president të SHBA, duke thënë se ka shpëtuar dhe Europën.
“Nëse flasim për Europën, është që unë vazhdoj të besoj, se kur Donald Trump tha dhe vazhdon të thotë; Zoti kishte një plan për të dhe Amerikën, nga përpjekja e tmerrshme për ta vrarë. Unë mendoj se kishte një pjesë të së vërtetës, pasi Zoti e ndihmoi që të shpëtonte dhe Europën”, tha Rama.
Një hipokrizi e radhës nga kryeministri, i cili e quajti Trumpin në mandatin e parë të tij si një “rrezik për botën”. Megjithatë, shpresojmë që të kuptojë se protagonizmi i tepruar ndonjëherë mund të kthehet në karma, sidomos kur tallesh me presidentin e shtetit më të fuqishëm në botë.
