Në nisje të episodit të 9-të të podkastit “Flasim”, kryeministri Edi Rama riktheu vëmendjen te ankimimi që ka depozituar në Gjykatën Kushtetuese për pezullimin nga detyra të ministres së Infrastrukturës, Belinda Balluku, duke e cilësuar atë si një kërcënim serioz për funksionimin e ekzekutivit.
Rama theksoi se ankimimi i tij “nuk është një betejë politike”, por një përpjekje për të mbrojtur balancën mes pushteteve dhe kompetencat ekskluzive të qeverisë, kryeministrit dhe Kuvendit. Ai e quajti vendimin për pezullimin e Ballukut “precedent krejt të panjohur në Europë dhe botën demokratike”.
“Ky veprim që ‘de jure’ quhet pezullim, por ‘de facto’ është një nënshtrim brutal i ekzekutivit, sjell përditë pasoja pas pasojash”, tha kryeministri, duke paralajmëruar dëme të pallogaritshme nëse situata nuk korrigjohet.
Rama solli edhe shembuj konkretë, duke përmendur vendosjen në arrest shtëpie të drejtorit të ARRSH-së dhe atij të KESH-it. Sipas tij, kjo ka lënë “pa kokë” dy institucione kyçe për infrastrukturën rrugore dhe energjetike, pasi pezullimi i ministres bllokon edhe procesin e emërimeve të reja.
“Ligji ia jep vetëm ministrit të drejtën për këto emërtime. Pezullimi e bën të pamundur zëvendësimin e drejtorëve dhe paralizon funksionimin e institucioneve”, u shpreh ai, duke nënvizuar se kjo situatë e bën pezullimin “jo vetëm antidemokratik, por edhe alogjik”.
Kryeministri shtoi se nuk ndërhyn në punët e drejtësisë, por se ndërhyrja e drejtësisë në trupën e qeverisë është një alarm serioz për demokracinë.
“Kjo duhet dëgjuar deri në fund, që të mos përsëritet më kurrë. Duke rivendosur secilin në pozicionin e tij kushtetues, ndihmojmë Shqipërinë dhe modernizimin e shtetit”, përfundoi Rama.
