“Nuk pres të vijë njeri nga qielli, njerëzit janë në PS”, me këtë fjali Edi Rama përkufizoi “ankthin” për qeverinë e re që pritet të shpallet më 11 shtator.
“Kemi njerëz që kanë më pak eksperiencë, por që mund të japin shumë. Do të jenë njerëz që do të shprehin vullnetin e 11 majit dhe ambicien time që ne të sillemi me arritjet mbi qeverinë. Do të jetë qeveri e re dhe jo çdo ministër e ka parë veten në këto thashetheme, sepse ka dhe ndonjë që s’e ka parë veten në këto thashetheme mediatike”, u shpreh kryeministri.
Rama siguroi gjithashtu se në kabinetin e ri do të respektohet barazia mes grave dhe burrave. Me këto mesazhe ai mbylli edhe spekulimet për emrat e kabinetit të ardhshëm, duke vulosur njëherë e mirë forcën e “njishit” në PS, ku autoritarizmi i kryetarit të qeverisë nuk lë më asnjë hapësirë ndikimi për lidershipin e partisë, e cila tashmë ka treguar se i bindet pa kushte vullnetit të kryetar-partisë.
