Asambleja e Përgjithshme e Kombeve të Bashkuara votoi me shumicë dërrmuese një deklaratë që i hap rrugë krijimit të shtetit të Palestinës. Megjithatë, Shqipëria, ndryshe nga pozicioni që kishte shprehur më parë kryeministri Edi Rama, abstenuan në votim, duke mos mbështetur asnjërën nga palët.
Në prill të këtij viti, gjatë vizitës së tij në Izrael, kryeministri Rama kishte theksuar se Shqipëria mbështet zgjidhjen me dy shtete.
“Siç e kam thënë më parë, dua ta përsëris edhe tani, Shqipëria ka qenë gjithmonë mbështetëse e zgjidhjes me dy shtete”, shprehej Rama.
Por në vend që këtë qëndrim ta shprehte edhe në votimin e fundit në OKB, Shqipëria zgjodhi të mos marrë pjesë në mbështetje të deklaratës, duke abstenuar dhe duke treguar një qëndrim neutral. Mesa duket qeveria e Shqipërisë ende nuk është e bindur për masakrën që po bëhet në Gaza ku mijëra fëmijëve jo vetëm që po u mohohet shteti, por edhe jeta.
Deklarata 7-faqëshe, e cila është rezultat i një konference ndërkombëtare në OKB në korrik, të organizuar nga Arabia Saudite dhe Franca, mori 142 vota pro, 10 kundër dhe 12 abstenime. Shtetet e Bashkuara dhe Izraeli votuan kundër.
Rezoluta gjithashtu dënon sulmet e Izraelit kundër civilëve dhe infrastrukturës në Gaza, si dhe rrethimin dhe urinë që kanë shkaktuar një katastrofë humanitare dhe krizë mbrojtjeje.
