Kryeministri Edi Rama prezantoi sot Besfort Lamallarin si ministrin e ri të Drejtësisë, duke ia ngarkuar atij një nga detyrat më të rënda të qeverisë: përfundimin e Kodit Penal, Kodit Civil dhe Kodit të Procedurës. Me një ton solemn, Rama u kujdes të theksonte se bëhet fjalë për “libra themeltarë” që duhet rishikuar me themel – sikur të ishin zbuluar dje që ekzistojnë.
“Duhet të përmirësojmë standardet, gjë që materializohet në punën e madhe që e pret Ministrinë e Drejtësisë për t’i dhënë formën përfundimtare versionit zyrtar që qeveria do të çojë në parlament. Dua ta çmoj punën e ministrit në aspektin e koordinimit të këtij procesi, ndërkohë që shkruesit e draftit janë profesorë dhe ekspertë të nderuar”, tha Rama, duke bërë sikur qeveria është thjesht “njëra nga shumë palët” – edhe pse dihet kush vendos fjalën e fundit.
Me këtë lëvizje, duket se Rama ka zgjedhur të “lajë duart” me Ulsiun, i cili për disa vite mbajti mbi shpinë “lavdinë” e drejtësisë rilindase. Tashmë, përgjegjësia i bie Lamallarit: të bindë shqiptarët se Kodi i ri Penal e Civil do t’u shërbejë qytetarëve, jo thjesht pushtetit. Një mision që, me gjasë, nuk do të shkruhet dot vetëm nga “profesorët e nderuar”, por nga urdhrat e Kryeministrisë.
