Kryeministri Edi Rama ka pezulluar për 5 minuta konferencën për mediat pas përplasjes që pati me gazetaren e Syri TV, Ambrozia Meta.
Përplasja nisi pasi gazetarja e pyeti Ramën pse qeveria nuk veproi me ish-zëvendëskryeministren njësoj siç vepron me qytetarët që nuk paguajnë dritat apo ndërtojnë pa leje.
Kryeministri nuk e priti mirë këtë paralelizim dhe e kundërshtoi gazetaren, duke theksuar se ndëshkimi penal lidhet vetëm me vjedhjen e energjisë dhe jo me mospagesën e faturave.
Debati me gazetaren u tensionua më tej kur Rama iu drejtua duke i thënë se ajo përfaqëson një televizion që, sipas tij, është denoncuar në Prokurori nga institucionet e shtetit për pastrim parash.
Pas kësaj përplasjeje, Rama vendosi të ndërpresë përkohësisht konferencën për pesë minuta, një veprim i pazakontë gjatë komunikimeve të tij publike me mediat.
