Në mbledhjen e sotme të grupit parlamentar të Partisë Socialiste, kryeministri Edi Rama përmendi edhe deputetin Erion Braçe gjatë fjalës së tij para deputetëve.
Rama tregoi një episod që, sipas tij, ia kishte rrëfyer gazetarja Jonida Shehu, e cila i kishte thënë se një deputet kishte refuzuar të dilte në media me fjalinë: “Pse si Erjon Braçe do bëhemi ne?”
Kryeministri e risolli këtë situatë në mbledhje duke iu drejtuar deputetëve me një koment ironik për Braçen.
“Ta keni për nder të merrni modelin e atij. Ama si ai nuk bëheni dot. Nuk ka të dytë dhe nuk durohen dy”, është shprehur Rama.
Megjithatë, gjatë gjithë mbledhjes nuk pati asnjë referencë për ambicien e përfolur të Braçes për të kandiduar për Bashkinë e Tiranës. Përkundrazi, komenti i Ramës u interpretua si një sinjal relaksi në raport me deputetin socialist, ndryshe nga përplasja e mëparshme që ai pati me Elisa Spiropalin.
Vetë Braçe nuk ka marrë fjalën gjatë mbledhjes së grupit parlamentar. Ndërkohë, deputetja Belinda Balluku ka raportuar për zhvillimet në zonën e saj elektorale.
