Kryeministri Edi Rama i është përgjigjur publikisht deklaratës së Shoqatës së Prokurorëve të Republikës së Shqipërisë mbi debatin kushtetues për pagat e magjistratëve, por ka zgjedhur të zhvendosë fokusin nga çështja e pagave drejt praktikës së paraburgimit. Reagimi i tij i publikuar në rrjetin social X sinjalizon jo vetëm një polemikë retorike, por edhe një ndërhyrje të drejtpërdrejtë në debatin mbi funksionimin e sistemit të drejtësisë.
Në reagimin e tij, Rama shkruan:
“A e kuptoni apo jo se çfarë quhet ‘ulje pagash’ në fillin e çuditshëm të këtij arsyetimi?
Mosngritja e pagave aq sa duan shoqatat e gjyqtarëve!!!
Pra, shqip, një pagë që s’më ngrihet sa ç’dua unë, është një pagë e ulur!!!
Duket totalisht e pabesueshme, po është shumë fatkeqësisht e vërtetë!”
Ai vazhdon duke pretenduar se qeveria nuk ka pasur kurrë ndërmend të ulë pagat e gjyqtarëve dhe se, përkundrazi, po punon prej një viti për ndërtimin e një “Poli Drejtësie si askund në Ballkan”, që sipas tij do të garantojë kushte pune të barabarta me nivelin e pagave në rajon.
Megjithatë, thelbi i reagimit të Ramës nuk mbetet te pagat. Ai kalon menjëherë në një sulm frontal ndaj praktikës së paraburgimit, duke i drejtuar një pyetje të drejtpërdrejtë Shoqatës së Prokurorëve:
“Po për shqelmimin e vazhdueshëm si askund në Europë të prezumimit të pafajësisë dhe kthimin e arrestit me burg pa gjyq në praktikë rutinë, që e ka njollosur Shqipërinë botërisht, a keni ndonjë gjë për të deklaruar?”
Kjo zhvendosje e debatit tregon qartë se shqetësimi i kryeministrit nuk lidhet realisht me pagat e magjistratëve, por me vendimet e gjykatave dhe dosjet e prokurorisë që prekin rrethin e tij politik dhe ekonomik.
Në thelb, Rama po përpiqet të delegjitimojë praktikën e paraburgimit, një instrument ligjor që vendoset nga gjykata, jo nga prokuroria e vetme. Duke e paraqitur atë si abuziv dhe politikisht të motivuar. Por në këtë mënyrë, ai po ndërhyn drejtpërdrejt në një territor që duhet të jetë plotësisht i pavarur nga pushteti ekzekutiv.
Fakti që kryeministri shmang debatin mbi standardet e pagave dhe garancitë kushtetuese për magjistratët, për t’u fokusuar te paraburgimi, flet më shumë për frikën nga pasojat e hetimeve dhe vendimeve gjyqësore sesa për një shqetësim real për të drejtat e njeriut.
Në çdo shtet demokratik, kryeministri nuk mund dhe nuk duhet të diktojë standardet e praktikës gjyqësore. Por në këtë rast, Rama jo vetëm që hyn në këtë debat, por e bën atë me një ton sulmues ndaj prokurorëve dhe gjyqtarëve, duke minuar besimin publik te pavarësia e drejtësisë.
