Kryeministri Edi Rama prezantoi sot një mënyrë të re për të parë Shqipërinë më pozitivisht: një gotë raki.
Në edicionin e dytë të MatchMaker Albania, përballë investitorëve të huaj, Rama vendosi të promovojë jo vetëm mundësitë e investimit, por edhe efektet “terapeutike” të rakisë shqiptare.
Sipas tij, një gotë raki mund të ndihmojë që Shqipëria të duket edhe më e mirë dhe, pse jo, të harrohen edhe disa nga problemet e saj të vjetra.
“Sot në stendën ‘takohu me qeverinë’ nuk do të gjeni vetëm raki, por edhe pak raki për ta provuar. Provojeni, do t’ju bëjë që Shqipëria t’ju duket edhe më e mirë. Por efekti më i madh është që do t’i sjellë të gjithë në qejf dhe të mos vuajnë artificialisht për këtë problemin tonë, korrupsionin dhe krimin e organizuar,” tha Rama.
Kështu, mes ofertave për investime, investitorët morën edhe një këshillë praktike: nëse korrupsioni dhe krimi i organizuar ju duken problem, zgjidhja është një gotë raki.
Në fund të fundit, nëse nuk ndryshojnë problemet, mund të ndryshojë të paktën mënyra si i shikon ato.
