Kryeministri Edi Rama ka zgjeruar këtë të premte hartën e tij të udhëtimeve diplomatike, duke u zhvendosur nga metropolet europiane drejt Azisë Lindore. Kreu i qeverisë, i shoqëruar nga bashkëshortja Linda Rama dhe një delegacion zyrtar, ka udhëtuar drejt Koresë së Jugut me një fluturim charter, kostoja e të cilit vlerësohet të ketë kaluar shifrën e 300 mijë dollarëve.
Kjo faturë, ku nuk janë përfshirë kostot e akomodimit dhe shpenzimet e tjera të delegacionit, vjen në një moment kur kriza e kostos së jetesës dhe rritja e çmimeve mbeten shqetësimet kryesore për familjet shqiptare.
Nëse udhëtimet në Europë na janë shitur gjithmonë nën ambalazhin e integrimit, ky udhëtim në Seul është projektuar si një mundësi për "thellimin e bashkëpunimit strategjik". Megjithatë, përtej gjuhës standarde diplomatike, dy vendet nuk kanë ndonjë histori të spikatur të shkëmbimeve ekonomike apo marrëdhënieve strategjike, kjo edhe për faktin e largësisë gjeografike.
Megjithatë, sipas agjendës zyrtare Rama pritet të mbajë një fjalim në një konferencë ndërkombëtare të lidershipit aziatik, ku do të diskutohet për sfidat globale, ndryshimet gjeopolitike dhe rolin e inteligjencës artificiale në qeverisje.
Kontrasti është i dukshëm. Ndërkohë që Shqipëria renditet ende ndër vendet me të ardhurat më të ulëta në rajon dhe përballet me sfida akute si korrupsioni dhe rënia e besimit te institucionet, kryeministri zgjedh skenat ndërkombëtare për të dhënë leksione. Një paradoks shqiptar ky që kësaj radhe eksportohet deri në Azi, vetëm se kësaj radhe kostoja që kemi paguar është tejet e kripur me mbi 300 mijë dollarë vetëm udhëtimi.
