Marrëveshja për ndryshimet Kushtetuese mes Edi Ramës dhe Sali Berishës duket se po shkon përtej retorikës politike, duke u kthyer në një realitet që mund të ndodhë së shpejti. Këtë e ka lënë të kuptohet edhe reagimi i kryetarit të grupit parlamentar të PS-së, Taulant Balla, një ditë pasi kreu i PD-së, Sali Berisha, deklaroi se është i gatshëm të ulet në tryezë për të diskutuar propozimin e Ramës për uljen e numrit të deputetëve dhe krijimin e një senati në Kuvend.
Balla, gjatë takimit të 20-të të Komitetit Parlamentar të Stabilizim-Asociimit Shqipëri–BE, u shpreh se propozimi i Berishës mund të trajtohet në Komisionin e Posaçëm për Reformën Zgjedhore.
“Meqë këtu është edhe kryetari i grupit parlamentar të PD-së dhe PL-së, nesër të kemi gati emrat që të vijojë punë dhe të plotësojmë kushtet për reformën zgjedhore. Kryetari i PD ka komentuar rreth reformimit të Kuvendit, sa i përket numrit, madje ka pasur edhe një propozim. Le të diskutohen edhe këto në Komisionin e Posaçëm të Reformës Zgjedhore” tha Balla.
Tashmë duket se PS dhe PD kanë avancuar në diskutimet për bashkëpunimin e radhës në ndryshimet kushtetuese dhe janë në fazën e paraqitjes publike të këtyre ideve. Kjo përforcohet nga fakti që nismat po artikulohen drejtpërdrejt nga drejtuesit kryesorë të dy forcave më të mëdha politike në vend, dhe jo nga përfaqësues apo analistë të tyre në media.
