Kryeministri Edi Rama duket se ka anuluar pjesëmarrjen në Samitin për Zgjerimin e Bashkimit Evropian, që zhvillohet sot në Bruksel me pjesëmarrjen e udhëheqësve të vendeve kandidate për anëtarësim në Union.
Fillimisht në media u raportua se Rama do të ishte pjesë e këtij samiti, por lajmi u fshi më vonë. Sipas burimeve të VNA, kreu i qeverisë ka vendosur të mos udhëtojë drejt Brukselit, megjithëse arsyet e anulimit nuk janë bërë publike.
Vendimi ngre pikëpyetje, duke qenë se integrimi në Bashkimin Evropian është një nga premtimet kryesore të mandatit të katërt të qeverisë socialiste, e cila synon ta përmbyllë procesin brenda vitit 2030.
Samiti i Zgjerimit të BE-së, që pritet të zhvillohet nga ora 14:00 deri në 17:00, ka në qendër diskutimet për forcimin e zërit të vendeve kandidate. Ndërkohë, presidentja e Komisionit Evropian, Ursula von der Leyen, e ka cilësuar këtë fazë të re si një proces të “ribashkimit të Evropës”.
Pra, ndërsa Edi Rama ka shpallur anëtarësimin në BE si objektivin madhor të mandatit të tij të katërt, në samitet që flasin pikërisht për zgjerimin e Unionit, ai mungon vetë. Premtimet për “Shqipërinë europiane” duket se po udhëtojnë pa udhëheqësin e tyre, ndoshta sepse rruga drejt Brukselit është më e lodhshme sesa problemet me korrupsionin në qeveri.
