Kryeministri Edi Rama, gjatë prezantimit të projektit “OSHEE Charge”, deklaroi se sektori energjetik ka hyrë në një fazë të re modernizimi, ndërsa theksoi se brenda vitit të ardhshëm do të nisë instalimi i 350 mijë matësve inteligjentë të energjisë.
“Sot kemi një inovacion, ndërkohë që brenda vitit të ardhshëm do të kemi matësat e energjisë, duke kaluar në sistemin e matëseve inteligjentë. 350 mijë matësa… Brenda këtij mandati do ta mbyllim këtë proces, që do ta ulë edhe më shumë nivelin e humbjeve në rrjet”, tha Rama.
Ai u ndal edhe te ambicia për ta kthyer Shqipërinë në eksportuese të energjisë:
“Objektivi më i madh strategjik është ta kthejmë Shqipërinë nga një vend në prag kolapsi, në eksportues të energjisë elektrike. Diçka që është në dorën tonë, brenda pak vitesh”, u shpreh kryeministri.
Rama bëri me dije se po punohet për ndërtimin e një datacenter-i të standardeve të fundit, si dhe për interkonjeksionin energjetik, që e cilësoi projekt kombëtar me vlerë strategjike:
“Po ecim me projektin madhor të interkonjeksionit, që do të na japë si vend epërsi strategjike në transportin e energjisë”.
Shefi i qeverisë njoftoi edhe rritje page për punonjësit e OSHEE, që nuk mbulohen nga buxheti i shtetit:
“Për 6800 punonjës do të ketë indeksim të pagave me 6.1%. Për elektricistët, rritje me 75 mijë lekë të reja në muaj, ndërsa për inxhinierët elektrikë rritja do të jetë 12 mijë e 500 lekë të reja në muaj”, tha Rama.
Në aktivitetin e prezantimit të “OSHEE Charge” ishte e pranishme edhe zëvendës kryeministrja Belinda Balluku. Rama theksoi se sektori i energjisë ka lënë pas menaxhimin e emergjencave dhe po futet në epokën e transformimit teknologjik.
