Menjëherë pas përfundimit të detyrës si Avokate e Popullit, Erinda Ballanca është emëruar në një tjetër funksion me mandat afatgjatë, kësaj here në një strukturë të Bashkimit Europian.
Ministria e Drejtësisë ka përzgjedhur znj. Erinda Ballanca si anëtare vëzhguese në Bordin e Menaxhimit të Agjencisë së Bashkimit Europian për të Drejtat Themelore (FRA). Paralelisht, z. Gledis Gjipali është caktuar si anëtar vëzhgues zëvendësues. Të dy do të ushtrojnë këtë funksion për një mandat pesëvjeçar, deri në vitin 2030.
Emërimi vjen menjëherë pasi Ballanca përfundoi mandatin e saj si Avokate e Popullit, një detyrë që e mbajti për 5 vite mandat të rregullt, të shoqëruar edhe me 3 vite të tjera zgjatje, duke e çuar praninë e saj në krye të institucionit përtej afatit fillestar të parashikuar.
Agjencia e BE-së për të Drejtat Themelore (FRA) është një institucion që ka për mision mbledhjen e të dhënave, hartimin e raporteve dhe dhënien e rekomandimeve mbi respektimin e të drejtave të njeriut në vendet anëtare të Bashkimit Europian, si dhe, në një masë të kufizuar, në vendet kandidate për anëtarësim. Roli i anëtarëve vëzhgues nga vendet joanëtare është kryesisht konsultativ dhe monitorues.
Ky emërim shton debatet mbi vijimësinë e funksioneve publike të ish-drejtuesve të institucioneve të pavarura dhe mënyrën se si përfundimi i një mandati kombëtar pasohet menjëherë nga një tjetër rol afatgjatë, këtë herë në nivel europian. Të njëjtin fat pritet të ketë dhe ish kryetarja e Gjykatës Kushtetuese Holta Zaçaj që kandidon në vendet e lira për bordin e Bankës së Shqipërisë.
