Qeveria shqiptare ka zbuluar ilaçin e magjishëm për të luftuar evazionin fiskal dhe krimin financiar: Inteligjencën Artificiale. Sipas dokumentit të publikuar për konsultim publik mbi “Strategjinë Kombëtare të Inteligjencës Artificiale”, modeli i ri do të analizojë në kohë reale faturat elektronike dhe deklaratat doganore, duke zbuluar transaksionet e dyshimta dhe duke reduktuar korrupsionin. Me pak fjalë, epoka e lapsit dhe letrës paska marrë fund.
Ironia është se këtë IA do ta përdorë pikërisht qeveria që nuk arriti të mbrojë as të dhënat personale të qytetarëve të saj. Qeveria që mburret me “shërbimet online” ndërkohë që qytetarët i detyron ende të bredhin me dosje kartoni nëpër zyra, tani premton një “rrjedhë pune inteligjente e plotësisht digjitale”.
Po sa i përket korrupsionit? Deri tani, hajdutët shqiptarë nuk kanë pasur nevojë për algoritme të sofistikuara. Ata kanë vjedhur me laps e letër, shpesh duke i bërë edhe gabim llogaritë. Dhe kur SPAK i ka kapur, nuk ishte falë ndonjë machine learning-u, por sepse hajdutët kishin harruar të fshinin faturën false nga sirtari i tavolinës.
Prandaj, ndërsa qeveria na shet përrallën e Inteligjencës Artificiale që do të “çmontojë korrupsionin”, e vetmja inteligjencë që qytetarët shohin çdo ditë është ajo burokratike dhe fasadë, që prodhon më shumë radhë e procedura sesa zgjidhje reale. Dhe për fat të keq, ajo është më e sofistikuar se çdo algoritëm.
