Qeveria digjet, por Blendi Gonxhja feston. Të paktën kështu duket nga postimi i ministrit të Kulturës, Rinisë dhe Sportit, i cili një natë më parë, bashkë me stafin e tij, e ka “djegur” duke festuar fundvitin.
“Asgjë nuk arrihet pa ata! Ekipi i MTKS, heronjtë e heshtur pas kuintave, pas skrivanive e orëve të gjata mbi letra, projekte e procese pune të lodhshme, që feston fundvitin plot motivim e entuziazëm për 2026-ën e sukseseve!” – shkruan Blendi Gonxhja, i cili mesa duket jeton në një realitet paralel, ku nuk sheh dhe nuk dëgjon çfarë po ndodh me qeverinë e drejtuar nga Edi Rama.
Se për çfarë arritjesh flet Gonxhja, këtë nuk e kupton askush, përveç stafit të pispillosur të ministrisë që ka gëzuar deri natën vonë me tinguj muzike dhe balerina, ndërkohë që kolegët e tyre në ministritë simotra janë kontrolluar nga SPAK.
Ndoshta Gonxhes kjo që ka ndodhur mund t’i ketë ardhur edhe mirë, për shkak të rivalitetit që kanë socialistët mes tyre, por një mendje normale dhe një qeveri me mendje në kokë nuk organizon festa luksoze kur gjysma e kabinetit nuk di ku e ka kokën: në SPAK apo në shtëpi.
Thënë ndryshe, Blendi Gonxhja bën mirë ta frenojë gëzimin për atë që po u ndodh shokëve të tij të qeverisë, sepse historia e partisë së tij ka treguar se kush gëzohet për hallet e shokut… i vjen SPAK-u dhuratë për festa.
