Kryeministri i Mbretërisë së Bashkuar Keir Starmer, ka njoftuar sot vendosjen e sanksioneve të reja ndaj rrjeteve kriminale të trafikimit të emigrantëve që veprojnë në rajonin e Ballkanit. Sipas njoftimit zyrtar, këto rrjete ndihmojnë emigrantët e jashtëligjshëm të arrijnë në territorin britanik përmes rrugëve të parregullta që kalojnë nëpër Ballkanin Perëndimor.
“Ekziston një rrugë kriminale që kalon përmes Ballkanit Perëndimor, e cila i çon emigrantët e parregullt drejt Mbretërisë së Bashkuar. Jemi të vendosur ta mbyllim atë, në bashkëpunim të ngushtë me partnerët tanë evropianë,” deklaroi kryeministri Keir Starmer, duke theksuar se qeveria e tij do të ndjekë një politikë të ashpër ndaj çdo forme të trafikut njerëzor dhe emigracionit të paligjshëm.
Britania e Madhe po përballet prej kohësh me një rritje të ndjeshme të numrit të emigrantëve që kalojnë Kanalin e La Manshit me varka të vogla. Sipas të dhënave zyrtare, nga fillimi i vitit 2025 deri më tani, numri i emigrantëve të parregullt që kanë mbërritur në brigjet britanike ka arritur në 36,734, dhe pritet që deri në fund të vitit të tejkalojë shifrat e vitit 2024.
Sipas deklaratës së Ministrisë së Jashtme britanike (Foreign Office), sanksionet e reja do të synojnë grupet kriminale në Ballkan që përfshihen në shitjen e pasaportave të falsifikuara, si dhe individët që ofrojnë pajisje dhe mjete transporti, përfshirë motorë për varkat që përdoren në kalimin e Kanalit të La Manshit. Të gjithë personat dhe grupet që do të përfshihen në listën e sanksioneve do të ndalohen të udhëtojnë drejt Mbretërisë së Bashkuar, ndërsa do të përjashtohen nga sistemi financiar britanik, duke iu bllokuar llogaritë bankare dhe çdo aktivitet financiar në territorin britanik.
Në të njëjtën ditë, kryeministri Starmer priti në Londër udhëheqësit e gjashtë vendeve të Ballkanit Perëndimor – Shqipërisë, Bosnje-Hercegovinës, Kosovës, Maqedonisë së Veriut, Malit të Zi dhe Serbisë – në një samit të posaçëm rajonal, ku marrin pjesë gjithashtu kancelari gjerman Friedrich Merz dhe shefja e diplomacisë së Bashkimit Evropian, Kaja Kallas.
Sipas njoftimit të Foreign Office, qëllimi kryesor i samitit është forcimi i bashkëpunimit midis vendeve të Ballkanit dhe Mbretërisë së Bashkuar në fushën e sigurisë evropiane, luftës kundër emigracionit të paligjshëm dhe zhvillimit ekonomik rajonal.
