Partia Socialiste do të vijojë punën për reformën zgjedhore dhe atë territoriale, pavarësisht vendimit të Sali Berishës për t’u tërhequr nga diskutimet, pas përplasjeve për zgjedhjen e Avokatit të Popullit.
Ky është qëndrimi i dakordësuar mes socialistëve gjatë mbledhjes së grupit parlamentar, e zhvilluar në Kryesinë e Kuvendit, ku i pranishëm ishte edhe kryesocialisti Edi Rama. Deputetët e PS kanë deklaruar se do të vazhdojnë pa vonesa punën për dy reformat e rëndësishme dhe se procesi nuk do të bllokohet për asnjë moment.
Për herë të parë në një mbledhje të grupit parlamentar u shfaq edhe zëvendëskryeministrja Belinda Balluku, pasi Gjykata Kushtetuese e riktheu në detyrë deri në shqyrtimin e ankimit të paraqitur nga kryeministri Rama.
Një tjetër vendim i rëndësishëm i kësaj mbledhjeje ishte ngritja e Komisionit të Etikës brenda Partisë Socialiste. Komisioni, i cili do të fokusohet në luftën kundër nepotizmit brenda strukturave të PS, do të drejtohet nga Lindita Nikolla dhe do të ketë për detyrë kontrollin e lidhjeve familjare në nivelet drejtuese të partisë.
