Kreu i Grupit Parlamentar të Partisë Socialiste, Taulant Balla, deklaroi sot se mazhoranca nuk do të paraqesë asnjë kandidat për postin e Avokatit të Popullit. Sipas tij, PS do të presë propozimet nga opozita dhe më pas do të vendosë se cilin emër do të mbështesë.
“Do të shqyrtojmë kandidaturat që do vijnë nga opozita. Më pas do të vendosim se cilën kandidaturë do mbështesim,” u shpreh Balla.
Ai iu referua edhe vendimit të GJKKO-së për pezullimin nga detyra të zv.kryeministres dhe ministres së Infrastrukturës dhe Energjisë, Belinda Balluku. Balla theksoi se, sipas interpretimit të kryeministrit dhe të tij personal, gjykata nuk ka kompetencë të pezullojë një ministër.
“Është një vendim nga GJKKO për pezullimin e një ministri. Në vlerësimin e kryeministrit, por edhe unë, edhe pas 21 vitesh mendoj se gjykata nuk e ka një kompetencë të tillë, sepse Kushtetuta, sipas nenit 103 pika 3, e ka barazuar ministrin me deputetin sa i takon imunitetit. Megjithatë, për fat të mirë, rendi kushtetues e ka përcaktuar qartë që kur ke një ankesë, e çon në Gjykatën Kushtetuese,” tha Balla.
