Grupi Parlamentar i Partisë Socialiste do të mblidhet të enjten në orën 11:00 në Pallatin e Brigadave për të vendosur lidhur me votimin e kërkesës së SPAK për arrestimin e Belinda Ballukut.
Mbledhja vjen pas asaj të Këshillit të Mandateve dhe Imunitetit ditën e hënë, ku socialistët dhe demokratët paraqitën dy raporte të ndryshme, pavarësisht fakteve të paraqitura nga prokurorët e SPAK, Klodian Braho, Dritan Prençi dhe Dorina Bejko. Sipas prokurorisë, Balluku ka intimiduar dhe kërcënuar dëshmitarë, ndërsa pozita e saj është rënduar duke e ekspozuar deri në 35 vite burg.
Kreu i Grupit Parlamentar të PS-së, Taulant Balla, deklaroi se socialistët nuk janë dakord me dhënien e menjëhershme të autorizimit për heqjen e imunitetit, siç ka propozuar Partia Demokratike, duke theksuar se vendimmarrja i takon seancës plenare.
“Me arsye të plota Kuvendi ka marrë kohën e nevojshme për këtë proces, edhe pas përfshirjes së Gjykatës Kushtetuese. Diskutimi i sotëm dhe pyetjet e anëtarëve të këshillit kanë hedhur dritë mbi elementin thelbësor, prezumimin e pafajësisë. Askush nuk është i fajshëm sa kohë nuk ka një vendim të formës së prerë të gjykatës”, u shpreh Balla.
Ai theksoi se Këshilli i Mandateve nuk jep autorizimin, por vetëm përgatit raportet, ndërsa vendimi merret në seancë plenare. Sipas tij, deputeti Ulsi Manja do të hartojë raportin në emër të pesë deputetëve të PS-së, ndërkohë që edhe PD do të paraqesë raportin e saj.
