Partia Socialiste po përgatitet që të marrë edhe pozicionin e Avokatit të Popullit, duke sfiduar traditën sipas së cilës ky emër duhej të propozonte nga opozita. Për herë të disatë, në Kuvend do të hapet gara për këtë post, por me 83 vota pro nga mazhoranca, PS nuk ka ndërmend të pranojë kushtëzime nga opozita.
Megjithatë, PS po tregon një qasje më të hapur në Reformën Zgjedhore. Kryetari i grupit parlamentar socialist, Taulant Balla, ka ofruar bashkëpunim për diskutimin e barazisë së anëtarëve në Komisionin e Posaçëm të Reformës Zgjedhore, duke ftuar opozitën për dialog në Konferencën e Kryetarëve që do mbahet të mërkurën. Megjithatë, kjo tolerancë nuk shtrihet edhe në Komisionin e Posaçëm për Reformën Territoriale, ku mazhoranca nuk po heq dorë nga pozicioni i saj.
