Ndërsa jashtë Kuvendit po zhvilloheshin dy protesta, minatorët e Spaçit që kërkojnë kushte më të mira pune dhe pensionistët që kërkojnë pensione dinjitoze ose të paktën minimumin jetik, në Parlament palët politike vijuan debatin e tyre të shterpë për disa javë, nëse Niko Peleshi duhet të jetë kryetar Kuvendi apo jo.
Opozita, që teorikisht do duhej të kishte në fokus shqetësimet reale të qytetarëve që protestonin vetëm disa metra më tutje, vazhdoi të merret me kohën që i duhet për të bërë zhurma dhe shamata politike me akuza boshe. Edhe këtë të enjte, PD vendosi të angazhohet për Niko Peleshin dhe kësaj radhe kishte depozituar raportin për shkakrimin e tij, ndonëse ishin të bindur se diçka e tillë nuk do të ndodhte.
Fjalën e mori deputeti i PD, Ivi Kaso, i cili akuzoi Peleshin se ka tentuar të heshtë opozitën dhe i kërkoi të largohet me dinjitet.
“Ik përpara votimit dhe jep dorëheqjen. Zgjidh dinjitetin tënd përpara detyrës së partisë. Ti je ai që ke tentuar të heshtësh opozitën në sallën e Sovranit. Do ikësh pa dinjitet, por do çlirosh Kuvendin nga drejtimi i një kryetari që nuk diti të drejtojë këtë institucion. Do ikësh pa dinjitet, por do t’u kesh kursyer kolegëve të maxhorancës të të mbrojnë me votë një muaj pasi ke marrë karrigen e numrit dy të Shtetit”, deklaroi Kaso.
Deputeti i PS, Damian Gjiknuri, iu përgjigj duke e mbrojtur Peleshin. Sipas tij, kryetari i Kuvendit nuk ka bërë asnjë shkelje dhe nuk duhet shkarkuar. Komentin e Kasos “ik dhe jep dorëheqjen” Gjiknuri e cilësoi si një recetë për kaos.
“Shkelja nuk ekziston, nuk ka shkelje, receta ‘ik ti se s’po e drejton mirë Kuvendin’ është recetë për kaos. Në fund prevalon rregulli. Niko ka bërë maksimumin e tij dhe, për natyrën e tij, e njoh prej vitesh – nuk hyn te miqtë e mi më të ngushtë, por as te armiqtë. Ai është njeriu që di të përballet me debatet dhe diskutimet me qetësi”, tha Gjiknuri.
Pra, një orë seancë shkuar dëm, pa diskutime që i shërbejnë qytetarëve, thjesht për retorikë dhe akuza politike. E gjitha u mbyll me votimin, ku kërkesa e opozitës jo vetëm u rrëzua nga mazhoranca, por mori edhe vetëm 10 vota kundër nga demokratët të bindur se shkarkimi i Peleshit nuk do realizohej, aq shumë saqë nuk u lodhën as të votonin.
