Partia Demokratike organizoi sot protestën e saj kombëtare përballë Kryeministrisë, në një formë dhe përmbajtje pothuajse identike me ato të zhvilluara më herët. Pjesëmarrja ishte më e madhe se ajo e “foltoreve”, por entuziazmi linte për të dëshiruar, ndërsa premtimi për një përballje pa ndalim u shua shpejt, ashtu si në protestat e viteve të fundit.
As këtë herë skenari nuk ndryshoi: disa kapsolla, bomba tymuese dhe shpërndarje e protestuesve pa asnjë vijim konkret. Paralajmërimet për një “betejë” dhe “revoltë mbarëpopullore” mbetën në nivel deklaratash, pa u shndërruar në një plan veprimi apo kalendar protestash.
Mitingu u mbyll me fjalën e Sali Berishës, i cili përdori një gjuhë të fortë dhe simbolike, duke e paraqitur përplasjen me qeverinë si luftë për liri.
“Na pyesin, çfarë do bëjnë këta? Jua them, ja do vdesim ja do rrojmë për liri. Dijeni mirë që kurrë nuk kemi humbur, kemi fituar, kemi fituar, do fitojmë. Po të japim fjalën që s’të ndahemi as në Surrel, marshim drejt Surrelit. Ai na ka shpallur luftë, ne i shpallim luftë armikut të shqiptarëve. Ke prek votën”, deklaroi Berisha, duke mbyllur ciklin e folësve.
Në miting folën edhe Belind Këlliçi, Gazmend Bardhi dhe përfaqësues të tjerë të Partisë Demokratike, por mesazhi mbeti i njëjtë: akuza ndaj qeverisë Rama dhe thirrje për revoltë, pa një adresim të qartë se çfarë do të ndodhë më pas.
Edhe pse pothuajse të gjithë folësit premtuan një përballje në çdo formë dhe mënyrë me qeverinë, Sali Berisha dhe organizatorët nuk lanë asnjë datë tjetër për një protestë të re kombëtare. Kështu, edhe kjo protestë u mbyll si shumë të tjera më parë: me retorikë të fortë, por pa vazhdimësi politike dhe pa një strategji që të dalë nga rrethi i përsëritur i tubimeve simbolike.
Të pranishëm në protestë ishin edhe të pakënaqurit me lidershipin e PD, ish-deputeti i Partisë Demokratike, Ervin Salianji, kandidati më i votuar në primare, Hysen Kadiu dhe disa nga grupi i demokratëve që po organizojnë takime nëpër Shqipëri.
Atmosfera e protestës nuk e ndaloi Salianjin t’i dërgonte mesazhin tjetër Berishës se nuk e përjashton dot asnjë nga PD dhe për të përsëritur se lëvizja e tij do të vazhdojë.
“Nuk më përjashton dot asnjë njeri. Sot është rradha për të përjashtuar Edi Ramën. Unë jam në PD, do të jem në PD. Jam bashkëdrejtues I një lëvizje shumë të rëndësishme në PD” tha ai për mediat.
Protestës iu bashkuashkuan për herë të dytë brenda javës dhe Argita Berisha dhe bashkëshorti i saj. Jo rastësisht vajza e Sali Berishës është riafruar në tubimet e PD ndërkohë që në parti ka nisur një proces debati i brendshëm për lidershpin.
