Qindra qytetarë iu përgjigjën thirrjes së kreut të “Shqipëria Bëhet”, Adriatik Lapaj, për protestën e radhës para Kryeministrisë, për të kërkuar dorëheqjen e qeverisë. Si në tubimet e mëparshme, qytetarët u mblodhën me simbole kombëtare dhe pankarta “Edi Rama o hajdut”, “Ku shkuan miliardat e vjedhura”.
Gjatë fjalës së tij, Lapaj deklaroi se kryeministri Edi Rama po humb fasadën e njeriut që qëndron krah drejtësisë. Sipas tij, kryemnistri i bën karshillëk qytetarëve duke mbajtur të korruptuarit pavarësisht skandaleve që i përfshijnë, ndërsa “injoron” edhe thirrjet e SHBA-së për luftë kundër krimit dhe korrupsionit në Shqipëri.
Lapaj gjithashtu u bëri sërish thirrje nga sheshi i protestës të gjitha partive opozitare që të bashkohen përtej kryetarëve apo flamujve partiak.
“Ne kemi thënë që synojmë një bashkim të madh opozitar në shesh, përtej kryetarëve dhe flamujve të partive. Forumi nuk do të përfaqësohet nga kryetarët e partive, por nga qytetarët e spektrit të ndryshëm politik, demokratë, pjesëtarë të ‘Shqipëria Bëhet’, të gjitha lëvizjeve dhe shoqërisë civile. Theksi duhet të jetë te Bashkimi Popullor, sepse nevoja është e përbashkët. Jo te liderët. Nuk bëjmë një marrëveshje me Sali Berishën”, tha ai.
Megjithatë, marrëveshja me Berishën duket se po avancon, pasi në protestë ishte i pranishëm edhe deputeti i PD, Besart Xhaferri, i cili tha se kishte marrë miratimin e kreut të PD.
“Patjetër që zoti Berisha e konfirmoi se, nëse kemi dëshirë, mund t’i bashkohemi kësaj proteste”, deklaroi Xhaferri.
Prania e kreut të Forumit Rinor të PD-së ishte një risie e protestës së Lapajt dhe një sinjal i qartë se PD dhe “Shqipëria Bëhet” po lënë mënjanë përplasjet e mëparshme dhe po afrohen politikisht.
Mbetet për t’u parë nëse të hënën Adriatik Lapaj do t’ia kthejë me të njëtjtën mënyrë duke qëndruar gjatë Foltores që do të mbajë Berisha para Kryeministrisë, pa u tërhequr nga pozicioni i tij siç ka bërë herët e tjera.
