Policia e Tiranës njoftoi se ka arrestuar 18 qytetarë, të cilët hodhën lëndë djegëse (molotovë), si dhe kundërshtuan dhe goditën punonjësit e Policisë gjatë tubimit të zhvilluar nga opozita.
Dy persona të tjerë janë shpallur në kërkim, ndërsa 17 u proceduan në gjendje të lirë. Nën hetim mes tyre edhe 3 deputetë të opozitës, Gazment Bardhi, kreu i grupit parlamentar të PD, Luçiano Boçi dhe Klevis Balliu.
“Gjatë zhvillimit të tubimit, disa prej pjesëmarrësve kanë kundërshtuar punonjësit e Policisë së Shtetit, të cilët ishin të planëzuar me shërbim për garantimin e rendit dhe sigurisë publike, si dhe kanë hedhur drejt tyre lëndë djegëse (molotovë)”, deklaroi policia.
Sipas njoftimit zyrtar, u lënduan 11 punonjës policie, të cilët morën ndihmë mjekësore në spital.
Policia bëri të ditur gjithashtu se materialet iu referuan Prokurorisë, ku nisi procedimi penal për shtetasin E. M., me detyrë sekretar organizativ i subjektit politik Partia Demokratike, për veprën penale “Organizimi dhe pjesëmarrja në grumbullime e manifestime të paligjshme”, si dhe për shtetasit L. B., K. B. dhe G. B., për veprën penale “Kundërshtimi i punonjësit të Policisë së Rendit Publik”.
