Prokurori i Përgjithshëm Olsian Çela deklaroi dje zyrtarisht se institucioni që ai drejton nuk ka qenë pjesë e grupit të punës për hartimin e draftit të Kodit të ri Penal. Media prezantoi dje gjerësisht vërejtjet e tij për Kodin.
Por dokumentat e siguruara sot nga VNA vërtetojnë se prokurori Kujtim Luli nga institucioni qendror i akuzës ka qenë pjesë e grupit të punës.
Në shkresën që mban datën 2 shkurt 2023 që disponon VNA shkruhet qartas se “konfirmojmë se përfaqësuesi i Prokurorisë së Përgjithshme në këtë grup pune do të jetë z. Kujtim Luli, shef i sektorit të Koordinimit, Studimeve dhe Integrimit”.
Tani nuk dihet me siguri nëse zoti Luli ka qenë nëpër mbledhje dhe nuk ia ka përcjellë shefit të tij ato çka janë diskutuar në takimet e grupit të punës apo thjesht zoti Çela nuk ka qenë në dijeni të ekzistencës së këtij grupi pune. Në fakt, drafti i publikuar i kodit të ri penal ka hasur në kundërshti të forta nga ekspertë të fushës, opozita dhe media.
Prokurori i Përgjithshëm Olsian Çela doli kundër draftit të kodit të ri Penal duke e cilësuar si një nismë të rrezikshme për sistemin e drejtësisë.
