Në procesin e përzgjedhjes së drejtuesit të ri të SPAK, nuk ka pasur presione direkte, por forma lobimi dhe mbështetje të hapura për kandidatë të caktuar. Kështu deklaroi kryetarja e Këshillit të Lartë të Prokurorisë, Mirela Bogdani, gjatë raportimit në Komisionin e Ligjeve dhe Nismat Qytetare.
“Për çështjen e presionit... më shumë është lobim. Disa janë tifozë të qasjes së një prokurori – një ndjek një linjë më represive, një tjetër më liberale. Por të gjithë janë pjesë e SPAK,” u shpreh Bogdani.
Ajo theksoi se roli i KLP në këtë proces është kryesisht formal dhe se institucionet po veprojnë sipas parashikimeve ligjore.
“Jemi në pritje nga Prokuroria e Posaçme të emrit që do të propozohet për drejtuesin e ri. Procesi është drejt përfundimit, por nuk mund të përcaktojmë një afat të saktë,” deklaroi Bogdani.
Kryetarja e KLP bëri të ditur gjithashtu se në mbledhjen e fundit është miratuar procedura me kushtet dhe kriteret formale për drejtuesin e SPAK. Më tej, procesi do të vijojë me verifikimin e dosjeve, analizën e kandidatëve dhe përfundimisht me votimin për emërimin e drejtuesit të ri të institucionit të posaçëm antikorrupsion.
