Punonjësit e Hipotekës Vlorë po përballen me presione pas dorëzimit të një peticioni, duke krijuar një situatë tensioni dhe pasigurie në institucion. Burime brenda stafit bëjnë me dije se, pas dorëzimit të peticionit, punonjësit kanë marrë mbështetje nga zëvendësdrejtori i ASHK Vlorë, Sokol Shehaj, por më pas ky i fundit është shkarkuar nga detyra.
Ndaj 55 punonjësve të Hipotekës Vlorë po ushtrohet presion për përgatitjen dhe dërgimin e materialeve drejt Tiranës, çka ka shtuar shqetësimin për vazhdimësinë e punës së tyre në qytet. Punonjësit shprehen se klima e krijuar po ndikon negativisht në mbarëvajtjen e institucionit.
Në shenjë reagimi, punonjësit kanë kërkuar ndërhyrjen dhe mbështetjen e përfaqësuesve të zgjedhur dhe kanë vendosur të pezullojnë përkohësisht punën, deri në sqarimin e situatës dhe gjetjen e një zgjidhjeje të drejtë.
