Politikanët përdorin rrjetet sociale për të treguar “punën” e tyre ose për të shpërndarë fjalimet e kryetarëve, por ka disa që pikasin jo për ide të reja, por për përgjigjet që u kthejnë komentuesve.
Benet Beci, kryetari i bashkisë Shkodër nga PS, dhe Flamur Noka, deputet i PD-së, duket se kanë gjetur një mënyrë më personale për t’u marrë me qytetarët, replikojnë me çdo komentues që nuk i duartroket.
Një komentues i shkruan Becit për mënyrën si po trajtohet biznesi në Shkodër, dhe ai ia kthen me një ton prej profesori i lodhur: “Turp që s’bën dallimin mes qytetit dhe xhunglës.”
Një tjetër i thotë: “Kësaj i vjen era mut, jo shtet,” dhe Beci, pa humbur durimin, ia kthen: “Të vjen ty.”
Madje, kur dikush e akuzon për shkatërrime, kryebashkiaku nuk e lë me kaq: “Të kemi prish gjumin.”
Por “kampion” i toneve agresive mbetet Flamur Noka. Komentuesve që e kundërshtojnë, ai u kthehet me fraza si “o kuqo, o karabush, pi nai cigare hashash” ose “i padale.” Duket se opozitari nuk e kursen as fjalorin e rrugës për të mbrojtur nderin e virtual të partisë.
Politikanët janë mësuar me emoji-t e duartrokitjeve nga militantët besnik apo shpesh herë dhe komentet nga call centerat dhe sapo shfaqet një kritikë e vogël, Beci e Noka transformohen në “replikues profesionistë” të Facebook-ut.
