Një tubim solidarizues me popullatën e Gazës, i parashikuar të mbahej sot në orën 18:30 në sheshin "Skënderbej", u ndërpre nga forcat e Policisë së Shtetit. Nën moton "Nga Tirana në Gaza, zëri i lirisë nuk ndalet", qytetarë të shumtë ishin mbledhur për të shprehur mbështetjen ndaj civilëve në Rripin e Gazës.
Pavarësisht se, sipas organizatorëve, tubimi ishte i njoftuar dhe me leje paraprake, uniformat blu ndërhynë duke kërkuar shpërndarjen e protestuesve. Sipas dëshmitarëve, policia u ka kërkuar pjesëmarrësve të ndalojnë mbajtjen e flamurit palestinez dhe të largohen nga sheshi.
Pamjet nga vendngjarja tregojnë tension mes qytetarëve dhe efektivëve të policisë, ndërsa disa protestues shprehën pakënaqësi për ndalimin e një aktiviteti paqësor dhe të paralajmëruar.
