Policia e Durrësit ka dhënë detaje lidhur me ekzekutimin e vendimit për arrestimin e kryetarit të Bashkisë së Rrogozhinës, Edison Memolla, i cili është shpallur fajtor për korrupsion aktiv në zgjedhje. Memolla është dënuar me 1 vit burgim nga Gjykata e Posaçme e Apelit kundër Korrupsionit dhe Krimit të Organizuar, vendim që la në fuqi dënimin e dhënë më herët nga shkalla e parë.
Sipas autoriteteve, Memolla u vetëdorëzua në Policinë e Kavajës pas shpalljes së vendimit, ndërsa strukturat e Policisë së Shtetit vijuan procedurat për ekzekutimin e dënimit. Ai u shpall fajtor për veprën penale “korrupsioni aktiv në zgjedhje”, kryer në bashkëpunim me persona të tjerë, të cilët po ashtu janë dënuar me nga 1 vit burgim.
Në reagimin zyrtar, Policia bëri me dije se specialistët e Seksionit për Hetimin e Krimeve Ekonomiko-Financiare në DVP Durrës ekzekutuan vendimin e datës 9 shkurt 2026 të Apelit të GJKKO-së, për disa shtetas banues në Rrogozhinë, të dënuar për korrupsion zgjedhor në bashkëpunim.
Vendimi ndaj Memollës është i formës së prerë dhe pritet të sjellë pasoja edhe në drejtimin e bashkisë, pasi Rrogozhina mbetet pa kryetar dhe mund të shkojë drejt zgjedhjeve të parakohshme për drejtimin e pushtetit vendor.
