Padia e qeverisë, Gjykata Kushtetuese vendosi kalimin e çështjes në Mbledhjen e Gjyqtarëve.
Kolegji i Gjykatës Kushtetuese ka vendosur t’i kalojë Mbledhjes së Gjyqtarëve kërkesën e paraqitur nga Kryeministri Edi Rama lidhur me çështjen e zv.kryeministres dhe ministres së Infrastrukturës dhe Energjisë, Belinda Balluku. Aktualisht ende nuk është caktuar një datë për zhvillimin e mbledhjes.
Të tetë gjyqtarët e Gjykatës Kushtetuese pritet të vendosin për fatin e ministres, ndaj së cilës është vendosur masa e ndalimit për të dalë jashtë vendit, si edhe pezullimi nga ushtrimi i funksioneve publike. Kalimi i çështjes në Mbledhjen e Gjyqtarëve nënkupton se brenda Kolegjit nuk është arritur unanimiteti i nevojshëm për të vendosur drejtpërdrejt mbi pranueshmërinë e kërkesës.
Në Mbledhjen e Gjyqtarëve do të shqyrtohen sërish të gjitha kriteret e pranueshmërisë, për të vendosur nëse çështja do të kalojë për gjykim në themel në një seancë plenare, apo nëse do të vendoset mospranimi i saj.
Njoftimi
Në vijim të njoftimit të mëparshëm për çështjen me kërkues Kryeministri i Republikës së Shqipërisë, Gjykata bën me dije si vijon: Kolegji i Gjykatës u mblodh sot në datën 02.12.2025, sipas planifikimit, për shqyrtimin paraprak të kërkesës. Kolegji vendosi kalimin e çështjes në Mbledhjen e Gjyqtarëve për të vlerësuar nëse plotësohen bashkërisht të gjitha kriteret e pranueshmërisë së saj për shqyrtim në seancë plenare në përputhje me nenin 31 të ligjit organik të Gjykatës Kushtetuese dhe nenin 24 të Rregullores për Procedurat Gjyqësore. Vendimmarrja e Mbledhjes së Gjyqtarëve do të njoftohet rregullisht në faqen zyrtare të Gjykatës Kushtetuese.
