Ka përfunduar mbledhja e Këshillit të Mandateve dhe Imuniteteve, ku u diskutua mandati i zëvendëskryeministres, Belinda Balluku. Kreu i grupit Parlamentar të PS, Taulant Balla, në prononcimin e shkurtër për gazetarët, tha se askush nuk është i fajshëm sa kohë nuk ka një vendim të formës së prerë të gjykatës.
Ai shtoi se PS nuk ishte dakord me mënyrën e propozuar nga opozita për dhënien e autorizimit dhe se çdo vendim do të diskutohet më tej në mbledhjen e parë të grupit parlamentar.
Pas këtij komenti, Balla u largua pa iu përgjigjur pyetjeve të gazetarëve, duke mos dhënë sqarime të mëtejshme mbi debatet e zhvilluara në mbledhje.
Nga ana tjetër, kreu i Grupit Parlamentar të PD, Gazment Bardhi, deklaroi se “nuk ka asnjë vendim të Këshillit të Mandateve që seanca të mbahet me dyer të mbyllura” dhe se nuk kishte surpriza gjatë mbledhjes. Ai akuzoi qeverinë për mbrojtje politike ndaj Ballukut dhe theksoi se situata penale e zëvendëskryeministres është rënduar.
Sipas Bardhit, prokurorët e SPAK kanë vënë në dispozicion të Këshillit të Mandateve prova konkrete që tregojnë se Balluku dhe persona të afërt kanë përdorur kërcënime dhe presion ndaj dëshmitarëve, duke përfshirë edhe oferta financiare për të ndryshuar dëshmitë. Ai shtoi se nëse akuzat provohen, Balluku mund të përballet me një dënim deri në 35 vjet burg.
