Në më pak se dy javë fillon sesioni i ri parlamentar dhe Partia Demokratike nuk përjashton mundësinë se betejën kundër zgjedhjeve të 11 Majit do t'a bëjë kudo. Kreu i Partisë Demokratike, Sali Berisha nga selia blu tha qartazi se beteja e opozitës bëhet kudo.
Partia Demokratike zgjedhjet e 11 Majit i konsideron "mega krim elektoral" dhe për këtë do kujdeset që të përfundojë librin e zi, me përmbajtje denoncime nga shkeljet në zgjedhje, për të cilat Sali Berisha tha se do t'i depozitojë në çdo kancelari deri edhe në NATO. "Ne këto ditë përfundojmë librin e zi të këtyre zgjedhjeve. Do t'a depozitojmë në çdo kancelari ndërkombëtare, deri edhe në NATO. Janë me mijëra fakte. Do më duheshin një muaj konferenca me përmbajtjet e denoncimeve. Por ne do i publikojmë"- deklaroi Berisha. Për këtë nuk përjashtoi edhe mundësinë e kërkesës së një komisioni hetimor parlamentar.
Konferenca
Pyetje: A do të shkojë PD në parlament?
Sali Berisha: Po afrohet momenti kur PD do të marrë vendimet përkatëse, një gjë është e sigurt që PD këto zgjedhje nuk do ti njohë kurrë.
Unë deklaroj këtu se çdo shqiptar, çdo opozitar që mendon se mund të tolerohen këto zgjedhje, bëhet bashkë autor në këtë mega krim elektoral dhe shkelmon mbi idealet e lirisë. Kam përshtypjen se shqiptarët do ti përgjigjen në mënyrën më të fuqishme kësaj farse që zhvilloi Edi Rama më 11 maj.
U përket shqiptarëve dhe opozitës të ngrihen me gjithë fuqinë e tyre, të gatshme për çdo betejë për rikthimin e votës së lirë të qytetarëve shqiptarë.
Pyetje: A do ta bëjë këtë betejë edhe në parlament?
Sali Berisha: PD do ta bëjë këtë betejë kudo. Është betejë për jetën ose vdekjen e votës së lirë.
