Gazment Bardhi njoftoi se PD do të organizojë protestë e radhës ditën kur Kuvendi të shqyrtojë mandatin apo imunitetin e deputetes, Belinda Balluku.
Gjatë një konference për shtyp ku prezantoi raportin për imunitetin e ish-zv.kryeministres, kreu i grupit parlamentar të PD deklaroi se qytetarët do të thirren të mblidhen para selisë së Kuvendit në ditën kur do të shqyrtohet kërkesa për autorizim.
Ai paralajmëroi se, në rast se Kuvendi refuzon kërkesën e SPAK, opozita do ta konsiderojë institucionin si një “bunker” ku, sipas tij, mbrohen zyrtarë të korruptuar.
Bardhi thekson se sipas standardeve kushtetuese, Kuvendi nuk ka kompetencë të vlerësojë masën konkrete të sigurimit apo nevojën hetimore, pasi kjo është kompetencë ekskluzive e pushtetit gjyqësor.
Raporti i PD bazohet në provat e sjella nga SPAK në Kuvend, jurispudencën kushtetuese, opinionet e Komisionit të Venecias si dhe frymën e luftës antikorrupsion.
“Prokuroria ka dokumentuar në mijëra faqe prova se bashkëpunëtorja e Edi Ramës, ish zv.kryeministrja Belinda Balluku, ka abuzuar me detyrën dhe në mënyrë korruptive ka paracaktuar garën për 11 procedura publike me vlerë 1.1 miliardë euro,”- tha Bardhi.
Sipas tij, masa e re e sigurisë ndaj saj është argumentuar nga prokurorët e SPAK me sjelljen e Ballukut pas marrjes si e pandehur me tentativat për të prishur provat dhe kërcënimit të dëshmitarëve, ‘përmes grupeve kriminale dhe përmes vartësve të saj’.
Në argumentimin ligjor të anëtarëve të Këshillit vihet theksi tek roli që ka Kuvendi për të verifikuar vetëm nëse kërkesa e prokurorisë ka apo jo motiv politik dhe jo për të marrë rolin e gjykatës që shqyrton masën e sigurisë në themel.
“Sipas jurisprudencës së Gjykatës Kushtetuese, pika 2 e nenit 73 synon të mbrojë veprimtarinë e vetë Kuvendit (jo të deputetëve të veçantë) për aq sa ajo mund të cenohet si rezultat i procedimeve penale me sfond politik ndaj deputetëve të veçantë. Në këtë kuptim vlen të theksohet edhe qëndrimi i Komisionit të Venecias, sipas të cilit imuniteti i deputetëve nuk është privilegj personal i tyre, por qëllimi kryesor i tij (imunitetit parlamentar) është mbrojtja e vetë parlamentit dhe në veçanti funksionimi i duhur i tij,” arsyetohet ndër të tjera në raport.
