Grupi Parlamentar i Partisë Demokratike i ka dërguar një letër zyrtare ambasadave në Tiranë, ku shpreh shqetësimin për zhvillimet e fundit në sistemin e drejtësisë, veçanërisht për mbledhjen e Kolegjeve të Bashkuara të Gjykatës së Lartë më 9 prill për shqyrtimin e masës së sigurisë “arrest në burg”.
Në letrën e firmosur nga kryetari i grupit parlamentar të PD-së, Gazment Bardhi, theksohet se kjo nismë është ndërmarrë nga kryetari i Gjykatës së Lartë, Sokol Sadushi, dhe sipas opozitës nuk ka një justifikim të qartë ligjor.
Sipas Bardhit, ndërhyrja në interpretimin e masës së paraburgimit në këtë moment mund të ketë pasoja të drejtpërdrejta në disa çështje të rëndësishme që po trajtohen nga drejtësia.
“Aktualisht, i vetmi zyrtar i lartë në detyrë që ndodhet në burg është kryetari i Bashkisë së Tiranës, Erion Veliaj. Gjithashtu, ky vendim mund të ndikojë edhe disa figura të profilit të lartë të krimit të organizuar që aktualisht ndodhen në paraburgim”, thuhet në letër.
Në dokument, opozita përmend edhe deklaratat publike të përfaqësuesve të lartë të ekzekutivit, duke ngritur shqetësimin se ato mund të krijojnë presion apo ndikim mbi institucionet e drejtësisë.
Partia Demokratike u kërkon ambasadave në Tiranë të monitorojnë nga afër procesin në Gjykatën e Lartë, të inkurajojnë transparencën dhe respektimin e standardeve ndërkombëtare të shtetit të së drejtës, si dhe të mbështesin institucionet shqiptare në garantimin e një drejtësie të pavarur dhe të paanshme.
Sipas PD-së, besimi i publikut në sistemin e drejtësisë mbetet thelbësor për stabilitetin demokratik dhe për procesin e integrimit europian të Shqipërisë, ndërsa çdo vendim me ndikim të gjerë duhet të mbështetet në parime të qarta ligjore dhe të mbrohet nga çdo perceptim për ndikim politik.
