Mbaji miqtë afër por armiqtë më afër – me këtë logjikë, Sali Berisha duket se do të rikonfirmojë në krye të grupit parlamentar të PD Gaz Bardhin. Ky i fundit, edhe pse arriti një rezultat të dobët në Fier, do të vijojë të mbetet ish-bashkëpunëtori i preferuar për kryetarin e PD. Me gjasë, dhe nisur nga historia politike, figurat që tentojnë të rebelohen ndaj tij, Berisha i cakton në detyra në dukje të rëndësishme, por në thelb të pavlera për karrierën politike. Kjo edhe për arsyen e thjeshtë se tashmë deputetët e PD do të jenë të shpërndarë në tre grupe parlamentare dhe, nisur nga numri i vogël i tyre në këtë parlament, drejtimi i Bardhit do të jetë thjesht simbolik. Po t’i shtosh kësaj edhe faktin se deputetët e PD janë të gjithë produkt i listës së mbyllur dhe i përzgjedhjes personale të Berishës, Gaz Bardhi do të mbetet thjesht një anëtar grupi me rrogë pak më të lartë dhe privilegje të tjera administrative, më shumë se deputetët e tjerë të PD.
Të njëjtën taktikë, Sali Berisha duket se do të ndjekë edhe me Jorida Tabakun, ku besohet se do t’i lërë vendin në Komisionin Parlamentar të Integrimit. Lidhjet e saj personale me disa nga partitë europiane apo në Komisionin Europian janë më të mira se ato të Albana Vokshit. Dhe pas telendisjes që i bëri në listën e Tiranës, tashmë Berisha do të vjelë frytet e anglishtes së Joridës për t’i shërbyer “non gratas” së tij.
Me një shtator që nis pa asnjë analizë apo plan opozitar, ndarja e posteve mes deputetëve të PD për privilegje banale parlamentare duket të jetë deri më sot i vetmi motiv për të shkruar ndonjë status kritik për Edi Ramën në Facebook. Sezoni i ardhshëm politik nuk pritet të sjellë ndonjë ndryshim me një kryeministër dhe një kryetar opozite që e kanë gjetur dhe tashmë e shijojnë “comfort zone” që i kanë caktuar njëri-tjetrit.
Të vetmit që mendohej se mund të sillnin një revolucion të vërtetë në opozitë tashmë janë në rreshtin e komanduar nga Sali Berisha, dhe veç bisedat nëpër tavolina kafenesh apo restorantesh do të jenë platforma ku do të kritikohet lidershipi i PD dhe do të përflitet me pseudonime kryetari i saj.
