Grupi Parlamentar i Partisë Demokratike ka depozituar në Kuvend kërkesën për ngritjen e një Komisioni Hetimor, i cili synon të verifikojë ligjshmërinë e veprimeve të zyrtarëve shqiptarë në lidhje me ish-agjentin special të FBI-së, Charles McGonigal. Objekt i këtij komisioni do të jetë verifikimi i ligjshmërisë së veprimeve të zyrtarëve shqiptarë, si dhe vlerësimi i nevojës për masa ligjore që garantojnë integritetin dhe korrektësinë në marrëdhëniet me zyrtarët e huaj.
Propozimi përbën një komision me 11 anëtarë, ku kryetari dhe katër anëtarë i përkasin Partisë Demokratike, ndërsa gjashtë anëtarë i përkasin Partisë Socialiste. Afati i veprimtarisë së këtij komisioni është 6 muaj.
Megjithatë, pavarësisht kërkesës dhe bazës kushtetuese që një Komision Hetimor mund të ngrihet me nismën e të paktën 35 deputetëve, Partia Demokratike aktualisht nuk disponon votat e nevojshme për ta realizuar këtë në Kuvend. Kjo situatë e bën të pamundur miratimin e ngritjes së Komisionit pa mbështetjen e partive të tjera, kryesisht të shumicës socialiste.
Në këtë kuadër, kërkesa e PD-së është më shumë një lëvizje politike dhe një përpjekje për të vendosur presion mbi mazhorancën, sesa një iniciativë e garantuar për të krijuar Komisionin Hetimor. Për më tepër kur bëhet fjalë për ngritjen e një komisioni ku kryeministri përflitet si i përfshirë, gjasat janë që kërkesa të mos merret parasysh.
