Grupi Parlamentar i Partisë Demokratike ka depozituar një kërkesë për interpelancë urgjente me Kryeministrin Edi Rama, duke kërkuar llogari për një takim të zhvilluar në Aruba në janar të vitit 2019, ku sipas dyshimeve, kanë qenë të pranishëm përfaqësues të qeverisë dhe krimit të organizuar.
Deputetët e PD, nën udhëheqjen e Sali Berishës, kërkojnë sqarime lidhur me mundësinë e ndikimit të grupeve kriminale në ekonominë shqiptare, përfshirë ndarjen e fondeve publike dhe dhënien e licencave për investime të dyshimta.
Kërkesa vjen pas hetimeve të gazetarit italian Nello Trocchia dhe raporteve ndërkombëtare që lidhen me pastrimin e parave dhe trafikun ndërkombëtar të drogës. PD kërkon gjithashtu informacion mbi mundësinë që grupe kriminale të përfitojnë leje ndërtimi dhe kontrata publike nga qeveria.
Deputetët që nënshkruan kërkesën janë: Sali Berisha, Gazment Bardhi, Jorida Tabaku, Agron Gjekmarkaj, Luciano Boci, Ina Zhupa dhe Flamur Noka. Partia Demokratike i bën thirrje Kuvendit që çështja të diskutohet në seancën e ardhshme plenare.
