Vetëm një ditë pas përplasjes mes opozitës dhe policisë para Kuvendit, nënkryetari i Partisë Demokratike, Luçiano Boçi, është ulur në të njëjtën tryezë me përfaqësuesin e mazhorancës, Arbjan Maznikun, në Komisionin e Posaçëm Parlamentar për Reformën Administrativo-Territoriale.
Komisioni u mblodh sot, më 11 shkurt, për të nisur punën mbi reformën e re territoriale, në një klimë që vetë palët e pranuan si të tensionuar.
Bashkëkryetari demokrat, Luçiano Boçi, theksoi se marrëdhëniet mes opozitës dhe mazhorancës në Kuvend nuk janë normale, duke ia atribuuar këtë sjelljes së PS ndaj PD-së, e cila më herët kishte bojkotuar mbledhjet e komisionit.
“Mos bëjmë rolin e atij që mbyll sytë dhe veshët. Marrëdhëniet në Kuvend mes opozitës dhe mazhorancës nuk janë në normalitet, por janë të tensionuara për shkak të sjelljes së mazhorancës. Nëse nuk ka produkt konsensual, atëherë është mungesë e gatishmërisë për të pranuar variantet,” tha Boçi.
Ai shtoi se nuk ka kuptim që komisioni të funksionojë nëse në fund mazhoranca del me një variant të personalizuar politik:
“Nëse rruga jonë kalon pjesërisht nëpërmjet konsensusit dhe në fund del me një variant të personalizuar politik, atëherë çfarë kuptimi ka komisioni? Ne duhet të kemi një produkt të përbashkët.”
Nga ana tjetër, bashkëkryetari socialist Arbjan Mazniku bëri thirrje që opozita të mos bllokojë procesin, duke argumentuar se reforma është e rëndësishme për vendin dhe për procesin e integrimit në BE.
Sipas tij, Shqipëria ka një “dritare të ngushtë” kohore për të ndërtuar bashki më funksionale dhe të afta për të tërhequr fonde europiane gjatë periudhës 2027-2029.
“Kemi një agjendë të ngjeshur pune. Mirëbesimi i dhënë nga mazhoranca nuk mund të jetë bllokim për punën. Na duhen bashki që jo vetëm të ofrojnë shërbime, por edhe të tërheqin financime dhe projekte nga BE,” deklaroi Mazniku.
