Partia Demokratike vijon të mos ketë një kandidaturë të shpallur zyrtarisht për garën në Bashkinë e Tiranës, ndërkohë që emrat që qarkullojnë deri tani janë vetëm vetëofrime.
Së fundmi, Dorian Teliti, nënkryetar i Këshillit Bashkiak, deklaroi në emisionin “Off the Record” në A2 CNN gatishmërinë e tij për t’u përballur me Ogerta Manastirliun, nëse strukturat e PD-së vendosin ta fusin garën në qendër të axhendës.
Teliti theksoi se opozita ka shumë figura të afta për të kontribuar, por sipas tij, kushdo që është aktiv në politikë duhet të jetë i gatshëm të hyjë në këtë sfidë. “Si mund të jesh nënkryetar i Këshillit dhe jo të jesh në garë? Është njësoj si t’i thuash një deputeti a do bëhesh ministër. Ka qindra kandidatura për Tiranën. Garat janë pjesë e jetës sonë”, tha ai.
Në këtë mënyrë, ndërsa mazhoranca duket më e qartë në drejtimin e saj me kandidaturën e Manastirliut, opozita mbetet ende pa një emër të konfirmuar, duke lënë hapësirë vetëm për vetëofrime dhe deklarata personale.
