Ndërsa zgjedhjet e pjesshme në 6 bashki janë vetëm një muaj larg, Partia Demokratike ende nuk ka emra kandidatë për të ofruar. Por për kreun e saj, Sali Berisha, ky duket se nuk është prioritet. Në vend që të japë sinjale përgatitjeje për garën, ai zgjodhi t’i kushtojë vëmendje batutave pa thelb të Edi Ramës për Donald Trump-in.
Në një konferencë për shtyp, Berisha foli gjatë për "ofendimet" e Ramës ndaj Trump-it dhe nuk kurseu akuzat ndaj kandidates së PS për Tiranën, të cilën e cilësoi si “një nga më të korruptuarat”. Por kur erdhi puna te kandidaturat e PD-së, fjalët u bënë më të pakta dhe më të kujdesshme.
Për tre emrat që përfliten për Tiranën, Ermal Hasimja, Edlira Çepani dhe Florjan Haçkaj, Berisha pati vetëm fjalë të mira, por asnjë konfirmim. Ai tha se deri në këtë moment PD ka diskutuar me partitë e tjera opozitare vetëm për modelin e kandidatit që do nxjerrin dhe jo për emrin.
“Këto janë emra shumë të mirë. Janë personalitete me vlera qytetare dhe morale të pakrahasueshme. Partia Demokratike siç unë kam shpjeguar këtu, gjatë këtyre kohëve është marrë me modelin jo me emrat. Me aleatët tanë ne kemi diskutuar për modelin që do ndjekim. Domethënë do të jetë ky një kandidaturë politike e PD apo nuk do jetë. Do të jetë kjo një kandidaturë politike e koalicionit, apo nuk do jetë. Do jetë një kandidaturë politike që do e mbështesin të gjitha partitë e koalicionit apo nuk do jetë. Pra, ku është ujdia më e madhe? Në cilin model? Por ne kandidatura kemi, kemi të pakrahasueshme me korbën e COVID-it dhe ne nga gara nuk tërhiqemi”, tha Berisha.
Megjithatë, fakti që deri më sot nuk është hedhur asnjë emër zyrtarisht, lë përshtypjen se data 9 nëntor nuk është aq afër për opozitën, ose të paktën nuk ndjehet si e tillë. Deri atëherë, PD-së nuk i mbetet gjë tjetër veçse të merret seriozisht me batutat pa shumë vlerë të kryeministrit dhe të sulmojë Ogerta Manastirliun, e cila ka nisur fushatën në Tiranë prej javësh.
