Kreu i grupit parlamentar të Partisë Demokratike, Gazment Bardhi, njoftoi se sot së bashku me deputetët e grupit do të depozitojnë në Kuvend raportin e Këshillit të Mandateve për dhënien e autorizimit ndaj deputetes Belinda Balluku, pas kërkesës së paraqitur nga SPAK.
Bardhi shprehet se grupi parlamentar i PD-së mbështet kërkesën e SPAK-ut, duke u bazuar në parimin e barazisë përpara ligjit dhe respektimin e drejtësisë.
Ai deklaron se prokuroria ka dokumentuar në mijëra faqe prova për abuzim me detyrën dhe paracaktim të procedurave publike nga Balluku, me një vlerë totale prej 1.1 miliard euro. Sipas organit të akuzës, këto veprime kanë shkaktuar dëm të konsiderueshëm financiar shtetit shqiptar dhe deputetja rrezikon dënim të lartë penal.
Bardhi shton se, sipas prokurorisë, gjatë këtyre muajve Balluku dyshohet se ka prishur prova dhe ka ushtruar ndikim mbi dëshmitarët. Ai akuzoi gjithashtu kryeministrin Edi Rama për mbrojtje politike ndaj Ballukut.
