Ndërsa për Bashkinë e Tiranës pritet të mbahen së shpejti zgjedhjet dhe e nominuara për të marrë frerët e institucionit, është Ogerta Manastirliu, kryebashkiaku ende në detyrë Erion Veliaj po vazhdon përpjekjet për të lënë qelitë e paraburgimit.
Për të dytën herë ai ka vënë në lëvizje Gjykatën e Lartë me rekurs, përmes të cilit kërkon heqjen e masës së sigurisë “arrest me burg”. Dy argumentat që pritet të paraqesë Veliaj tashmë në të gjitha shkallët e gjykimit, janë; së pari hetimet janë përfunduar dhe nuk ka më asnjë rrezik të prishë provat apo intimidojë dëshmitarët dhe së dyti, nuk ka më asnjë pushtet politik që të ushtrojë influencë.
Gjykata e Lartë pritet të shqyrtojë rekursin e kryebashkiakut dhe të vendosë nëse do të vijojë të qëndrojë në paraburgim apo do ta zbusë masën e sigurisë për të. Veliaj është zyrtarisht i pandehur për 13 akuza, ndërsa bashkëshortja e tij, Ajola Xoxa për 11 akuza. Të pandehur janë marrë edhe 28 persona të tjerë, shoqëri tregtare dhe OJF.
