Sekretari i Përgjithshëm i PD, Flamur Noka, ka shtuar akuzat ndaj ish-deputetit, Ervin Salianji, duke thënë se për takimin në Elbasan ka bashkëpunuar jo vetëm me Suel Çelën, por edhe me Ergys Agasin dhe Ben Qimen.
Në një intervistë për News24, Noka tha se me këtë veprim Salianji ka kaluar çdo vij të kuqe dhe për këtë arsye është vetëpërjashtuar nga partia.
“Zotëria nuk është anëtar i Kryesisë dhe strukturave të Partisë Demokratike. I keni informacionet gabim. Që kur u vetëpërjashtua. Që kur u ul me Gys Agasin, Ben Qimen për të organizuar aktivitetin në Elbasan. Është vetëpërjashtuar se PD ka një vijë të kuqe. Marrëveshja me krimin mafian, e kemi vijë të kuqe e kemi me statut. Kjo është histori e mbyllur”, tha Noka.
Mbrëmjen e djeshme, pas përfundimit të protestës së PD para kryeministrisë, Noka ka larguar Salianjin nga grupi i Kryesisë së partisë në WhatsAp, ç’ka u pa si hapi i radhës për përjashtimin e ish-deputetit të PD.
Përplasja mes drejtuesve të PD dhe Salianjit ka filluar që kur ky i fundit nisi takimet me demokratët e bazës për të kërkuar ndryshime në lidershipin e partisë, por duket se po bëhet kurbani i radhës i Sali Berishës.
