Pas kritikave që lëshoi ndaj drejtësisë për çështjen e Ballukut dhe pengimin e SPAK, kryeministri Edi Rama u paraqit sot në Asamblenë e PS me retorikë tjetër ndaj drejtësisë. Rama tha se drejtësia në vend ka qenë gjithmonë e pafuqishme dhe e ndikuar, duke shtuar se pushteti ekzekutiv tashmë e ka dorëzuar “shpatën e pushtetit gjyqësor” te vetë pushteti gjyqësor.
“Drejtësia është vënë në një shtrat të përgjakur dhe të ndyrë. Më parë, ajo nuk ka qenë kurrë e lirë dhe as e pavarur, e paanshme, jo e jo. Më vjen keq që ta them për ata që e kërkojnë nga ne dhe për ata që na akuzojnë, s’ka të bëjë fare me ne. Ne e kemi dorëzuar shpatën e pushtetit gjyqësor te pushteti gjyqësor”, tha ai.
Por që një drejtësi të jetë e lirë dhe e pavarur, duhet që të veprojë pa u penguar. Këtu mazhoranca socialiste e Edi Ramës tregoi të kundërtën, pasi vetëm disa javë më parë, me shumicën e votave në Parlament, nuk votoi kërkesën e SPAK për t’i hequr mandatin e deputetit Belinda Ballukut.
